DISYEMBRE 16, 2025 — Tuluyan nang ibinasura ng Sandiganbayan 2nd Division ang kasong graft at malversation laban kay Teddy Tumang, dating alkalde ng Mexico, Pampanga, at iba pang mga akusado, kaugnay ng umano’y anomalya sa pagbili ng construction materials noong 2009 at 2010.

Ayon sa anim na pahinang resolusyon na isinulat ni Presiding Justice Geraldine Econg, tinabla ng anti-graft court ang hiling ng prosekusyon na bawiin ang naunang desisyon na nagkaloob kay Tumang at sa kanyang mga kapwa akusado ng demurrer to evidence dahil sa kakulangan ng ebidensiya.

Una nang iginiit ng prosekusyon na nagkaroon ng “gross misappropriation of facts” at “grave abuse of discretion” nang ibasura ang kaso, lalo’t umano’y hindi napatunayan na inabuso ni Tumang ang kapangyarihan sa pagkakaloob ng kontrata sa Buyu Trading and Construction. Subalit pinaninindigan ng Sandiganbayan ang desisyon, dahil hindi nakapagpakita ang prosekusyon ng karagdagang ebidensiya at argumento upang mabawi ang pagbasura ng kaso.

Nag-ugat ang kaso na inihain ni dating Ombudsman Samuel Martires noong 2023, kaugnay ng umano’y pag-bypass ng mga akusadong opisyal sa mandatory public bidding rules sa pagbili ng construction materials para sa pagkukumpuni ng mga kalsada, na hindi rin naideliver sa barangay na dapat sana’y benepisyaryo. Kasabay ng desisyon, binawi na rin ng korte ang hold departure order laban kay Tumang at sa iba pang kinasuhan, na naglilinis sa kanilang mga record laban sa kontrobersiyang procurement. (Larawan: Newsline Central Luzon / Facebook)