DISYEMBRE 16, 2025 — Tiniyak ni Pangulong Ferdinand “Bongbong” Marcos Jr. na matatanggap na ng mga pamilyang Pilipino ang matagal nang naabandonang balikbayan boxes sa Bureau of Customs (BOC) bago sumapit ang Pasko.

Sa kanyang pahayag sa pagbubukas ng bagong pasilidad sa Ninoy Aquino International Airport (NAIA) Terminal 3, sinabi ng Pangulo na sinimulan na ng BOC ang proseso ng pagpapalabas ng 130 container vans na naglalaman ng mga padala mula sa overseas Filipino workers (OFW).

Matagal nang nakatiwangwang ang mga kahon sa loob ng Customs warehouse matapos hindi mabayaran ng ilang freight forwarders ang kaukulang buwis at bayarin. Dahil dito, halos isang taon nang hindi naipapadala ang mga kahon sa kanilang mga pamilya.

“Nais ko rin ibalita na sinisimulan na ng BOC ang proseso upang maipamahagi ang isang daan at tatlumpung abandonadong container van na balikbayan boxes sa mga nagmamay-ari nito,” ani Marcos. 

Dagdag pa ng Pangulo, sisimulan na ang pagbabalik ng mga kahon ngayong Disyembre 16. Aniya, ang hakbang na ito ay hindi lamang para maibalik ang mga padala kundi upang ipakita ang mas matibay na koordinasyon ng pamahalaan at mga sektor na may kinalaman sa serbisyo publiko.

Ang balikbayan boxes ay matagal nang simbolo ng sakripisyo ng mga OFW para sa kanilang pamilya. Kaya’t ang pagbabalik nito bago ang kapaskuhan ay inaasahang magdadala ng ginhawa at tuwa sa mga tatanggap.

Sa kabila ng pagkaantala, tiniyak ng administrasyon na paiigtingin ang mga mekanismo upang maiwasang maulit ang ganitong sitwasyon at mapabilis ang proseso ng pagpapalabas ng mga padala sa hinaharap.

(Larawan: Bureau of Customs)