OKTUBRE 23, 2025 — Sa gitna ng lumalalim na imbestigasyon sa maanomalyang flood control projects, tiniyak ni Interior Secretary Jonvic Remulla na walang makakalusot sa batas — maging ordinaryong kawani o mataas na opisyal ng gobyerno.

Sa inspeksyong isinagawa sa Pasay City Jail, iginiit ni Remulla na ang mga opisyal ng gobyerno na may Salary Grade 26 pababa na masangkot sa kaso ay ituturing na karaniwang bilanggo. Hindi sila bibigyan ng espesyal na trato, at hindi rin sila ilalagay sa opisina ng warden.

“Absolutely no special treatment, especially in the floodgate [scandal]. If they are involved and have been indicted in court, they will be treated as regular inmates. If you stole P100, you’ll be jailed here. If you stole P100 million, you’ll also be jailed here,” pahayag ni Remulla. 

(Walang espesyal na trato, lalo na sa floodgate [scandal]. Kung sangkot ka at kinasuhan sa korte, karaniwang bilanggo ka. Kung P100 ang ninakaw mo, dito ka makukulong. Kung P100 milyon ang ninakaw mo, dito ka rin.)

Ang Pasay City Jail, na orihinal na dinisenyo para sa 103 bilanggo, ay kasalukuyang may 964 persons deprived of liberty (PDLs), na may congestion rate na higit sa 800%. Sa kabila nito, sinabi ni Remulla na handa ang pasilidad na tumanggap ng mga bagong detainees na sangkot sa flood control corruption.

Ayon sa DILG, ang mga opisyal na may Salary Grade 27 pataas ay hindi ikukulong sa Camp Crame, kundi sa bagong Quezon City Jail – Male Dormitory sa Payatas. Ito ay bahagi ng hakbang upang matiyak na pantay ang trato sa lahat ng akusado.

“I gave strict instructions that no one is allowed to place an inmate in the warden’s office so they will be in the common cells,” ani Remulla. 

(Mahigpit kong inutos na walang sinuman ang dapat ilagay sa opisina ng warden. Dapat sila ay nasa karaniwang selda.)

Tinatayang nasa 200 hanggang 250 katao ang posibleng ma-indict sa susunod na tatlong linggo, batay sa mga ebidensyang lumitaw sa mga pagdinig sa Senado. Kabilang sa mga nabanggit ni Remulla ang ilang senador, district engineers, kongresista, at mga opisyal ng COA na umano’y nagpapatunay sa mga proyektong hindi naman talaga naipatayo.

Dagdag pa niya, magsasagawa ng CCTV monitoring ang BJMP upang maiwasan ang anumang pabor-pabor sa loob ng kulungan.

“There is no longer a La Cathedral, no longer a place for rich people to live inside the prison. I will not allow that. The law is the law and we will follow it, no matter how painful it gets for anyone,” giit ni Remulla. 

(Wala nang La Cathedral, wala nang lugar para sa mayayaman sa loob ng kulungan. Hindi ko ito pahihintulutan. Ang batas ay batas at susundin natin ito, gaano man ito kasakit para sa iba.)

(Larawan: Philippine News Agency)