DISYEMBRE 10, 2025 — Upang tugunan ang kakulangan sa digital na pagbabayad para sa mga bumibisita sa bansa, nakikipag-ugnayan ngayon ang Department of Tourism (DOT) sa GCash para sa posibleng malawakang paggamit ng e-wallet sa sektor ng turismo.

Sa isang pagpupulong nitong Martes, nakaharap ni Tourism Secretary Christina Garcia Frasco ang mga opisyal ng GCash upang talakayin ang mga hakbang sa modernisasyon ng transaksyon sa turismo. Isa sa mga pangunahing isyu na binigyang-diin ay ang limitadong opsyon sa pagbabayad na nararanasan ng mga dayuhang turista.

Kabilang sa mga mungkahing inilatag ang pansamantalang access sa GCash para sa mga banyaga, in-app booking ng mga pangunahing pangangailangan sa biyahe, at paggamit ng platform para sa promosyon ng kampanyang Love The Philippines. Layunin nitong gawing mas madali at mas episyente ang paglalakbay sa bansa.

Bago pa man ang nasabing pagpupulong, nakipag-partner na ang Tourism Infrastructure and Enterprise Zone Authority (TIEZA) sa GCash upang gawing mas maayos ang proseso ng refund para sa mga exempted sa travel tax. Sa naturang kasunduan, tiniyak na walang dagdag na convenience fee ang mga refund, bagay na nakatulong sa mas mabilis na pag-proseso para sa mga biyahero.

Ayon kay Frasco, ang digital na inobasyon ay mahalagang hakbang para sa mas inklusibong turismo. 

“We want to ensure that our visitors experience convenience and accessibility in their transactions,” aniya. 

(Nais naming matiyak na mararanasan ng ating mga bisita ang kaginhawaan at madaling access sa kanilang mga transaksyon.)

Sa pamamagitan ng posibleng pakikipagtulungan sa GCash, inaasahang mas mapapalawak ang opsyon sa pagbabayad para sa mga turista, lokal man o dayuhan. Ang hakbang na ito ay nakikita bilang mahalagang suporta sa patuloy na kampanya ng DOT na gawing mas kaakit-akit at mas abot-kaya ang pagbisita sa Pilipinas.

Kung maisasakatuparan, magiging mas simple ang pagbili ng mga serbisyo at produkto sa turismo, mula sa booking ng biyahe hanggang sa pagbabayad ng travel tax, na lahat ay maaaring gawin sa isang mobile app. Sa ganitong paraan, inaasahang mas mapapalakas ang tiwala ng mga turista sa sistema ng pagbabayad sa bansa.

(Larawan: Department of Tourism - Philippines | Facebook)