Oktubre 4, 2025 – Isinusulong ngayon sa Mababang Kapulungan ng Kongreso ang House Bill 5081 o mas kilala bilang Interns’ Rights and Welfare Bill, na naglalayong bigyan ng mas malinaw na proteksyon, benepisyo at karampatang kompensasyon ang mga student intern sa bansa.

Ang panukala ay inihain ni Akbayan Party-list Rep. Chel Diokno, kasunod ng mga ulat ng pang-aabuso at hindi makataong kondisyon na nararanasan ng maraming intern. Kabilang sa mga reklamong natanggap ang labis na oras ng duty, kawalan ng malinaw na bayad, at pagkakait ng basic benefits tulad ng leave at insurance.

Sa ilalim ng nasabing panukala, magiging mandato para sa mga kumpanya at institusyon ang pagbibigay ng tamang working hours, bayad o allowance, insurance coverage, leave benefits, at iba pang mekanismo ng proteksyon. Layunin nitong tiyakin na ang internship ay mananatiling bahagi ng proseso ng pag-aaral at pagsasanay, at hindi gawing paraan ng libreng paggawa ng ilang negosyo o organisasyon.

Iginiit ni Diokno na dapat igalang ang dignidad ng mga intern, na kadalasang mga estudyanteng naglalayong magkaroon ng karanasan at paghahanda para sa kanilang propesyon. “Hindi dapat ituring na libreng manggagawa ang interns. Sila ay mga kabataan na dapat suportahan at bigyan ng makataong kondisyon sa kanilang pagsasanay,” diin ng kongresista.

Kung maisasabatas, inaasahang magiging malaking hakbang ito laban sa unpaid labor at posibleng magtakda ng bagong pamantayan para sa internship programs sa bansa. Positibo rin itong makaaapekto sa kalidad ng edukasyon at pagtatrabaho ng mga estudyante, dahil magkakaroon sila ng mas patas at ligtas na karanasan sa kanilang on-the-job training.

Sa ngayon, nakatakdang pagdebatehan at talakayin sa mga komite ng Kamara ang panukalang batas. Umaasa naman ang mga tagapagtaguyod nito na makakakuha ito ng malawak na suporta mula sa iba pang mambabatas at stakeholders, lalo na sa hanay ng mga estudyante at guro.