MANILA, Philippines — Isang bagong paraan ng cashless payment ang parating sa bansa matapos kumpirmahin na ilulunsad na sa Pilipinas ang Google Pay. Matapos ang ilang taong paghihintay, magiging isa na rin ang bansa sa mga huling merkado sa Timog-Silangang Asya na tatanggap ng naturang serbisyo.

Hindi tulad ng tradisyunal na bangko o e-wallet, hindi nag-iimbak ng pera ang Google Pay. Isa lamang itong teknolohiyang nagbibigay-daan upang makabayad ang mga gumagamit gamit ang kanilang linked credit o debit cards sa pamamagitan ng isang tap sa kanilang Android phone o smartwatch.

Kamakailan, nilinaw ng Bangko Sentral ng Pilipinas (BSP) na ang Google Pay at Apple Pay ay hindi na kailangan ng espesyal na lisensya bilang Operators of Payment Systems (OPS) dahil ang mga lokal na bangko at payment providers pa rin ang may pananagutan sa seguridad at regulasyon ng mga transaksyon. Ito ang nagbigay-daan para sa opisyal na pagpasok ng Google Pay sa bansa. Ayon sa mga industry watchers, nakikipagtulungan ang Mastercard sa mga lokal na bangko upang ihanda ang integrasyon ng Google Pay. Wala pang opisyal na petsa ng paglulunsad, ngunit inaasahang maglalabas ng anunsyo ang mga partner banks at maglulunsad ng promosyon kasabay ng pormal na rollout.

Kapag aktibo na sa bansa, magagamit ang Google Pay para sa:

• Tap-to-pay transactions sa mga tindahan, kainan, at pampublikong transportasyon.
  
  

• Pag-store ng cards at tickets sa Google Wallet. (Sa ngayon, may ilang event tickets na gaya ng Etix ang maaari nang i-save digitally.)
  
  

• Pag-link ng local bank cards na kasosyo ng Mastercard at iba pang networks.
  
  

• International transfers sa piling pagkakataon. Sinusubukan ng Google ang remittance feature kasama ang providers tulad ng Ria, Xe, Wise, at Stripe.
  
  

Sa panahon na mabilis ang paglago ng cashless adoption sa Pilipinas—lalo na sa tulong ng GCash at Maya—nag-aalok ang Google Pay ng kakaibang opsyon: hindi ito wallet kundi extension ng mismong bank card ng gumagamit.

Para sa mga commuter, mamimili, at concert-goers, nangangahulugan ito ng mas kaunting pisikal na card na kailangang dalhin at mas magaan na digital lifestyle.

Sa regulatory clearance mula BSP at nakahandang mga bangko para sa integrasyon, handa nang sumali ang Pilipinas sa milyon-milyong gumagamit ng Google Pay sa buong mundo.

Bagama’t wala pang eksaktong petsa ng paglulunsad, malinaw na malapit nang ma-experience ng mga Pilipino ang tap-to-pay convenience gamit ang kanilang mga smartphone. (Larawan: Google)