MANILA — Abala ngayon si Eman Bacosa Pacquiao, anak ni boxing legend Manny Pacquiao, sa kanyang masinsinang paghahanda para sa nalalapit na laban sa Pebrero 2026.

Ayon sa ulat, magsasagawa si Eman ng rigorous training camp sa Davao ngayong Disyembre at Enero upang matiyak ang kanyang kondisyon sa ring. Sa kanyang pahayag, ibinahagi ng 21-anyos na boksingero: “Gigising po ako ng 4 o’clock or 3 o’clock in the morning. Tapos magja-jogging po ako ng 15 to 13 kilometers.” Dagdag pa niya, bahagi ng kanyang routine ang shadow boxing, sit-ups, at push-ups bilang bahagi ng conditioning.

Bukod sa pagsasanay, sinabi ni Eman na ipagdiriwang nila ang Pasko sa Davao kasama ang pamilya, na mas pinili ang simpleng selebrasyon habang nakatutok siya sa kanyang training.

Batay sa tala ng BoxRec, si Eman ay may professional record na 7 panalo, 0 talo, at 1 draw, kabilang ang 4 na panalo sa pamamagitan ng knockout. Huli siyang lumaban noong Oktubre 25, 2025 sa Araneta Coliseum kung saan tinalo niya si Nico Salado. 

Nagsimula ang kanyang karera noong Setyembre 2023 sa programang Manny Pacquiao Presents: Blow by Blow, kung saan nagtapos sa split draw ang kanyang debut laban kay Jommel Cudiamat.

Sa ulat ng KAMI News, binigyang-diin ni Eman na ang kanyang disiplina at maagang paggising ay mahalaga upang makamit ang pinakamainam na kondisyon para sa laban. 

“My routine will require discipline and early mornings to ensure I am in top condition for the fight,” aniya.

Bukod sa boxing, pinagsasabay din ni Eman ang kanyang showbiz commitments at pag-aaral sa ALS (Alternative Learning System), na nagpapakita ng kanyang determinasyon na balansehin ang sports at edukasyon.

Ang laban sa Pebrero ay inaasahang magiging mahalagang hakbang sa karera ni Eman, na patuloy na sinusubaybayan ng publiko bilang isa sa mga bagong mukha ng Philippine boxing.

Larawan mula Eman Pacquiao