TALAVERA, NUEVA ECIJA — Isang lalaki ang nasawi matapos pagsasaksakin ng kapwa pasahero sa loob ng isang Genesis bus habang bumibiyahe sa Barangay Pinagpanaan, Talavera, noong gabi ng Oktubre 25.

Batay sa mga ulat, nagmula ang bus sa Baler, Aurora at patungong Metro Manila nang biglang sumiklab ang kaguluhan habang binababa ng konduktor ang mga kargamento malapit sa isang tulay. Nagdulot ito ng takot sa mga pasahero, na nagsipagtakbuhan palabas ng sasakyan.

Ayon sa mga saksi, bago pa man ang insidente, napansin nilang tila may kakaibang kilos ang suspek—nakikipag-usap umano ito sa sarili. Ilang sandali lang ang lumipas, bigla nitong inatake ang biktima gamit ang patalim.

Agad rumesponde ang mga pulis at naaresto ang suspek, na hindi nagtangkang tumakas at nanatili sa paligid ng bus. Patuloy ang imbestigasyon ng mga awtoridad upang matukoy ang motibo sa krimen at kung may kinalaman ang mental na kalagayan ng suspek.

Ang insidente ay nagdulot ng pangamba sa mga residente at muling nagbigay-diin sa pangangailangan ng mas mahigpit na seguridad sa pampublikong transportasyon.

Larawan mula Nueva Ecija TV48